CIFP Carlos Oroza

O CIFP Carlos Oroza é un centro educativo público dependente da Consellería de Educación da Xunta de Galicia, que imparte formación de ciclos pertencentes ás familias profesionais de Hostalaría e Turismo e de Industrias Alimentarias.

O noso centro iniciou a súa andadura como centro educativo no ano 1996. Dende esa data e ata o momento actual pasou por diferentes etapas que se iniciaron sendo un IES (Instituto de Ensino Secundario) e no ano 2004 cambia a súa denominación pola actual de CIFP Carlos Oroza, xa que é acreditado como Centro Integrado de Formación Profesional para contribuir á necesidade de abranguer a formación regrada, a ocupacional e a contínua.

Desde o mes de decembro de 2022, pertencemos á RED ESTATAL DE CENTROS DE EXCELENCIA DE FORMACIÓN PROFESIÓNAL no sector de HOSTALARÍA.

Situación

Está situado na zona periférica do municipio de Pontevedra, capital da provincia homónima. As súas instalacións atópanse dentro da Cidade Infantil Príncipe Felipe, estando ben comunicadas co centro da cidade por estar moi preto do Hospital de Montecelo.

Pola proximidade tanto do centro da capital de provincia, como das comarcas do Morrazo e do Salnés, sendo esta última unha referencia no turismo galego, existe unha gran demanda de profesionais especializados no sector da hostalaría xa que cada vez é máis útil ter unha formación especializada e completa pola crecente demanda deste perfil técnico por parte do empresariado do sector da hostalaría e do turismo.

Acceso

Existe transporte urbano entre a cidade de Pontevedra e o Hospital de Montecelo, que queda a uns metros do noso centro. Esta liña sae da Estación de autobuses, con parada na Praza de Galicia e detrás do Hospital Provincial. Os horarios pódense ver na páxina web da compañía de transporte http://www.monbus.es/es ou no teléfono 902 29 29 00.

Ademais, existe unha liña denominada «Príncipe Felipe Escolar» que sae da estación de autobuses, de luns a venres.

O CIFP Carlos Oroza forma parte dunha edificación situada na Cidade Infantil Príncipe Felipe, na avenida Montecelo nº 16.