Continúan as actividades do proxecto Oroza no Mercado, unha iniciativa formativa que permite ao noso alumnado poñer en práctica os seus coñecementos nun contexto real, ofrecendo ao público propostas gastronómicas en formato petisco no Mercado de Pontevedra.

Durante este mes de maio, haberá datas abertas ao público nas que será necesaria a reserva previa a través desta web. Así mesmo, o centro acollerá tamén varias xornadas en colaboración co proxecto Biomisión, unha iniciativa coordinada polo CSIC e desenvolvida pola Misión Biolóxica de Galicia, que busca achegar a ciencia e a biodiversidade aos centros educativos. Nesta ocasión, diferentes colexios participarán en actividades formativas e degustacións organizadas polo alumnado do CIFP Carlos Oroza no mercado. A oferta gastronómica nestas datas xirará en torno a algunhas das brassicas traballadas cos colexios no proxecto Biomisión: verza, brócoli, coles de bruxelas, repolo e nabo.

As datas xa reservadas para estas xornadas con centros educativos vinculados ao proxecto Biomisión son o 15, 20, 22, 23 e 27 de maio. O resto de días, mentres non se confirmen novas participacións escolares, estarán dispoñibles para o público xeral.

Cómpre lembrar que trátase dunha proposta enmarcada nun contexto formativo de ensino e aprendizaxe e que non se trata cunha contorna profesional senón que é un paso máis na formación do futuro do sector hostaleiro galego.

Se vostede quere participar desta actividade formativa que propón o noso alumnado pode facelo a través desta pasarela de reservas.

Co fin de que o maior número de persoas podan desfrutar destas xornadas non se permitirán peticións de máis de catro comensais por reserva nin tampouco duplicidade de peticións (que a mesma persoa trate de reservar en máis dunha ocasión).

O horario de inicio da actividade é o mesmo para todas as prazas que ofertamos en cada xornada sendo o inicio común para todos os participantes as 12:30 horas.

Trátase dunha actividade de degustación onde o público se adaptará á oferta gastronómica dispoñible con dúas bebidas como máximo.

Esta actividade procura mellorar as competencias profesionais do alumnado que participa nela sendo ao mesmo tempo unha colaboración do CIFP Carlos Oroza co Concello de Pontevedra e a Consellería de Cultura, Educación, Formación Profesional e Universidades.